د.مصرقع

بسم الله الرحمن الرحيم



السلام عليكم ورحمة الله وبركاته

اخوان خواتي اعضاء المنتدى عسل
حيت انقل لكم هذي القصيده للشاعر الكبير

حمد بن محمد المخلفي - (_الجسار_)

يا هاتفي جريت بالصـوت مـوال
قـاف ن بنيتـه والمـوارد رويـه
لا ني بمتغزل بمن لبسـت الشـال
أم الخـدود الناعـمـات النـديـه
اللي إليا مرت مع البيـض تختـال
غريافـة فـازت بطـلـه بهـيـه
ولا ني بطالب حاجة من هل المـال
ولا أبغى أتوسط بالنفوس الرديـه
الحمد لله حالتـي بأطيـب الحـال
مبسـوط وأدي واجـب الله عليـه
أسج لا من ضاق صدري مع سهال
اطـرد بكـاري ذيـك وأرد ذيــه
أصيح لنياقـي وأهوبـل تهوبـال
وليا زعجت الصوت جنـي سريـة
أشوش كني بالوغى وصف خيـال
سمع الصياح ولا حسـب للمنيـة
شهم شجاع معرب الجـد والخـال
مجناه من روس الهضـاب العليـة
تنخاه بنـت تنهمـه بيـن الأزوال
تعـرف فعولـه ليبسـن الشفيـه
وسل املح ما يشبعه غير الأبطـال
ولعيونهـا لـوح بظهـر العبيـه
وقبل شعاع الشمس ينذر بمرسـال
فـي عبلـة خضـراء ودار خليـه
أشب نـاري وأقـدح البـن بـدلال
واضبط على كيفي هوى الشاذليـه
بنيت قافي مدح في طيـب الفـال
الشاعر اللي مسنـد القـاف ليـه
حييت يالي شوفته تشـرح البـال
وتنبت سهال القلب لو هي سنيـة
وافـي ودايـم للمراقيـب نــزال
مراقـب الطـولات لوهـي نحيـه
لك في رياض القلب يالقرم مدهـال
ولك منزل عالـي ولـك مقدريـة
والوقت مهما شان والبعد لو طـال
مايقطع حبـال الوصـال القويـة
وترى الرجال ألوان وأطوال وإشكال
لكـن معادنهـم عليـنـا خفـيـه
ماكل من حط الشنب صـار رجـال
ولا كل تاجـر يستطيـع العطيـة
ولا كل من حـط المغاتيـر جمـال
ولا كل حـي سـد بغيـاب حيـه
دنيا تخلي صاحـب العقـل يهتـال
متقلبـه مابيـن صبـح وعشيـه
فيها ارتفع رقم المؤشـر للأنـذال
وفيها انخفض طبع الشرف والحميه
فيها انقلاب وميل في كل الأحـوال
ولا عاد به راعي ولا بـه رعيـه
راع الرديه صار مضـرب للأمثـال
كل يبـي قربـه ويصبـح خويـه
وراع العلوم الطيبة زيـح للجـال
بليـة ياكبـرهـا مــن بلـيـة
وختامها منـي تحيـات وإجـلال
وصـلاة لمحمـد رسـول البريـة

أتمنى أن تنال اعجبكم
تحياتي