منة اهلاوية

مشكلتي باختصار إني حبيت واحد على النت وبقالنا سنة مع بعض، هو مصري زيي بس عايش في مصر وأنا عايشة برة مصر وبسافر كل سنة.

أول ما تعرفنا فهّمته إني عمري ما كلمت حد وأنا فعلا عمري ما كلمت حد في حياتي غيره سواء على النت أو برة. وهو تأكد من كده لأنه أخذ الباسوورد بتاعي وكلم صاحباتي طبعا بعلمي.

المشكلة إن ماما قالت لي أسيبه ودخلت ولقيته لواحده بيقول لي مالك أنا حلمت حلم وحش قولي لي مالك أنا طبعا مقدرتش أقول له سيبني فقلت له إنه أنا اتخانقت مع أخويا وقفلت معاه بعدها خليت واحدة كلمته وأقنعته إننا لازم نسيب بعض، بس بعدها مقدرتش فكلمته ولقيته بيتكلم ببرود وبيقول لي أيوه نعم أي خدمة وطبعا قعدت أعتذر، لحد ما تصالحنا، بس حصلت مشاكل كتير وهو بدأ يشك في لأني عملت حاجات تضايقه وهو بيعرف لأنه صاحبه على النت عايش هنا في نفس مكاني ويعرف صاحباتي.

أنا بحبه جدا بس حاسة إنه خلاص نسي حبنا وكتير بنتخانق ونسيب بعض بس أنا اللي برجع هو بيتعامل دلوقتي بطريقة باردة جدا ولا كأنه يعرفني وعلطول بيشك وعلطول بيزعق سواء على التليفون أو على النت ازاي أثبت له إني بجد بحبه وعمري ما خنته وازاي أتأكد من حبه

a

صديقتي العزيزة:

من خلال رسالتك يا عزيزتي قدرت أستنتج إنك شخصية متقلبة جدا ومشاعرك مش واضحة حتى لنفسك، وده اللي مسبب لك المشاكل اللي بتمري بيها، والحقيقة يا عزيزتي أنا مش من المشجعين للحب عن طريق النت واتكلمنا في مشاكل كتير جدا بتحصل بسبب إن الاتنين مش بيكونوا صادقين مع بعض أو على الأقل واحد منهم، أو صادقين لكن لما بيتقابلوا بيكتشفوا إن فيه بعض حاجات تانية ما كانوش شايفينها في بعض عن طريق النت، وبالنسبة لمشكلتك فهي أكبر من ده كله مشكلتك إنك إنتِ اللي سمحت للشخص ده من البداية إنه يشك فيك وللأسف ما زعلتيش من كده بل على العكس إنتِ شايفة إنه لما يكلم صديقاتك عشان يتأكد من كلامك ده شيء عادي، ولكن في الحقيقة ده شيء مش عادي أبدا، ده إنت بكده شجعتيه على إنك يعاملك بطريقة الشك في كل تصرفاتك طالما راضية.


وللأسف إنتِ بتصرفاتك بعد كده لما طلبت منه إنه يبعد عنك وبعد كده تتأسفي وترجعي تاني وبعد كده يشك في تصرفاتك وإنتِ في البلد اللي إنتِ فيها وبعدين تقولي إنك كنتِ بتعملي حاجات مش صح وصديقه بيوصلها له، في الحقيقة مش واضح من كده أبدا إنك بتحبيه ولا هو كمان.

الحب يا عزيزتي أساسه الثقة والاحترام والصدق وإنتم ضيعتم كتير من الأساسيات دي، يبقى الأصلح لك إنك تقعدي مع نفسك وتراجعي تصرفاتك وتحسبيها بالعقل هل صح ولا غلط، وبعدين تراجعي مشاعرك ناحية الشخص ده هل هي حقيقية ولا لأ، وصدقيني لو راجعت نفسك بجد هتكتشفي حقائق كتير كانت غايبة عنك... وربنا يهديكِ.